Mu mukino wa gicuti wahurije hamwe ibyamamare byo muri ruhago y’u Bufaransa hagamijwe gukusanya inkunga yo gufasha abatishoboye, Perezida Emmanuel Macron yawitwayemo neza awutsindamo igitego.
Ku wa Gatatu taliki 24 Mata 2024, nibwo Perezida Macron yabikoze ubwo bari mu gikorwa ngarukamwaka cyo gufasha cy’Umuryango Brigitte Macron’s Hospital Foundation washinzwe n’umugore we.
Perezida Macron, yari ari mu ikipe imwe n’abandi bakinnyi bakanyujijeho barimo umutoza w’ikipe y’Igihugu y’u Bufaransa Didier Deschamps, Eden Hazard na Didier Drogba bakina n’ikipe irimo Arsène Wenger, Samuel Etóo n’abandi.
Iyi kipe yari iyobowe na Perezida Macron yatsinze ibitego 5-3, harimo igitego cye kimwe, yatsinze kuri penaliti nk’uko yabikoze mu 2021 ubwo aheruka kugaragara mu mukino nk’uyu.
Intego nyamukuru y’uyu mukino yasize hamaze gukusanywa inkunga ingana n’ibihumbi birenga 60$, azifashishwa mu gutanga ubuvuzi ku bana badafite kirengera bari mu bitaro bitandukanye.
