Bamwe mu babyeyi n’abanyeshuri hirya no hino barimo kwitegura gukora ibizamini bya Leta cyane cyane abasoza icyiciro cya mbere n’icya kabiri by’amashuri yisumbuye bari kuvugako barimo gucibwa amafaranga y’umurengera mu gihe hari bamwe batakaje indangamanota(School reports).
Indangamanota z’imyaka yabanje ni bimwe mu byangombwa bikenerwa n’ikigo cya NESA kugirango bemererwe gukora ibizamini kuko biyandikisha mu ikoranabuhanga SDMS.
NESA bakimara gushyira itangazo ahagaragara risaba abitegura gukora ibizamini bya Leta ko batangira kwiyandikisha ku wa 26/2/2024 bikazasozwa ku wa 31/3/2024 bamwe mu bayobozi b’ibigo bavuzeko Manu yabo yongeye ibonetse.
Manu ya ba Diregiteri ni iyihe?
Ikinyamakuru UMURUNGA amakuru gikura ku ishuri rya GS Gako,riherereye mu karere ka Kicukiro,umurenge wa Masaka,akagari ka Gako ni uko umunyeshuri wese wabuze indangamanota yishyuzwa amafaranga ibihumbi bitanu(5000 Frw) abikwa mu mufuka wa Diregiteri na Director of Studies(Ushinzwe amasomo);aya makuru yemezwa na bamwe mu banyeshuri ko ariwe bayaha.
Aba bayobozi banavugako ngo iyo igihe kigeze cyo kwandika abanyeshuri mu bizamini bya Leta ngo nibwo Manu yabo iba imanutse kuko ngo inzira zose zanyuragamo ifaranga zafunzwe.
Ababyeyi babivugaho iki?
Bamwe mu babyeyi barerera muri iki kigo cya GS Gako ndetse no mu bindi bigo bitandukanye bavugako bazengerejwe na bamwe mubayobozi babaka amafaranga ndetse bo babonamo ubusambo.
Umwe utifuje ko amazine ye ajya ahagaragara wo mu karere ka Rwamagana yagize ati:” Ibaze amafaranga ibihumbi 5 ya Bulletin yatakaye,uziko nta cyangombwa na kimwe muri Leta gifite agaciro kangana gutyo!Uziko ijya kugura nka Lessez-passe!
Undi nawe ati:”Iyo usabye irangamuntu hishyurwa 500,ibyemezo by’amavuko n’ibindi Leta rero nishyire indangamanota ku irembo uwayibuze adekarare(declaration)”.
Abanyeshuri bamwe bavutswa ibizamini bya Leta
Aya mafaranga bivugwako iyo abuze ubwo biba birangiye kwiyandikisha gukora ibizamini bya Leta,bamwe bihita bibaviramo kuva mu ishuri ubwo drop out ikaba irabonetse.
Ni mugihe amafaranga yose umunyeshuri yatangaga ngo akore ibizamini bya Leta yakuweho.
Iki kibazo ubwo cyashyirwaga ahagaragara NESA batangaje ko bagiye kubikurikirana
Mwaramutse neza,
Turabikurikirana.
Murakoze— NESA Rwanda (@NESA_Rwanda) March 7, 2024
Tubibutse ko ibi biri kuba mu gihe Leta n’abafatanyabikorwa b’umushinga wa Zero Out-Of-School Children bari mu bukangurambaga.
Ubwo twakoraga iyi nkuru UMURUNGA wamenye amakuru ko iki kibazo cyagaragajwe ku ishuri rya GS Gako, NESA yahise ikurikirana kuri ubu amafaranga ababyeyi babakaga y’umurengera ubu byahagaritswe ndetse na Diregiteri yabajijwe ibisobanuro n’umurenge wa Masaka.
