Kakooza Nkuriza Charles, KNC, Umuyobozi w’Ikipe ya Gasogi United, yabwiye abakinnyi be ko bagomba gukora ibishoboka byose bakitegura neza umukino wa Kiyovu Sports.
KNC, ku wa 27 Mutarama 2024, yatangaje ko yamaze gusesa ikipe abereye Umuyobozi ya Gasogi United kubera icyo yise umwanda uri muri ruhago y’u Rwanda.
Uyu muyobozi akimara gutangaza aya magambo yahise anandikira inzego bireba zirimo Ishyirahamwe ry’Umupira w’Amaguru mu Rwanda, FERWAFA n’Ubuyobozi bwa Shampiyona y’Icyiciro cya mbere, Rwanda Premier League Board.
Mu nama KNC yakoranye n’ikipe ye kuri uyu wa Gatatu tariki 31 Mutarama 2024, yasabye abakinnyi gukorana imyitozo ubushake, bitegura kuzatsinda umukino w’umunsi wa 19 uzabahuza na Kiyovu Sports ku wa Gatandatu tariki 03 Gashyantare 2024, uzabera kuri Kigali Pelé Stadium.
Iki cyemezo cyashyize mu rujijo cyane abakunzi b’Umupira w’Amaguru mu Rwanda, kubera ko KNC yari yatangaje ko nta mpamvu n’imwe yatuma agarura iyi kipe muri Shampiyona y’u Rwanda.
KNC si ubwa mbere asesa ikipe ye ariko bikarangira yisubiyeho ku cyemezo yari yafashe.
