Mu Karere ka Gicumbi, mu Murenge wa Rwamiko, haravugwa umugabo wiyahuriye mu bwato bwo ku Kiyaga cya Muhazi, witwa Rusigariye Berchmas w’imyaka 47 y’amavuko.
Inzego z’ibanze zatangaje ko uyu mugabo ku wa 29 Mutarama 2024, yagiye mu bwato bwari ku nkombe z’ikiyaga cya Muhazi mu Mudugudu wa Kigaga mu Kagari ka Nyagahinga, agezemo hagati arasimbuka ariyahura.
Amakuru avuga ko ku bufatanye bw’ubuyobozi bw’Umudugudu n’abamurebaga bahise bamukurikira bamuvanamo, bamujyana ku Kigo Nderabuzima cya Rwesero, akigerayo ahita yitaba Imana.
Icyateye uyu mugabo kwiyahura ntikiramenyekana, gusa abaturage bavuga ko yari yiriwe anywa inzoga muri Centre ya Kigaga, akaba anakekwaho kunywa ikiyobyabwenge cy’urumogi.
Umuseke dukesha iyi nkuru watangaje ko wagerageje kuvugisha Umunyamabanga Nshingwabikorwa w’Umurenge wa Rwamiko, Beatrice Jolie, ariko ntibyakunda.
Mu gihe hagitegerejwe ko umurambo wa nyakwigendera woherezwa ku Bitaro bya Byumba ngo ukorerwe isuzumwa, umurambo wari ukiri ku Kigo Nderabuzima cya Rwesero.
