Umugande Steven Kabuye, uzwi cyane mu bikorwa byo guharanira uburenganzira bw’abaryamana bahuje ibitsina bazwi nk’abatinganyi mu gihugu cya Uganda, yatewe icyuma n’abantu bataramenyekana arakomereka cyane.
Ibi byabaye mu gitondo cy’ejo hashize ku wa Gatatu tariki 03 Mutarama 2023, ubwo yari mu nzira agiye ku kazi nk’uko bivugwa n’ishyirahamwe rye.
Itsinda Coloured Voice- Truth to LGBTQ mu butumwa ryanyujije ku rubuga rwa X ryagize riti: “Amerewe nabi cyane,turabasaba ko mwagumisha amasengesho ku mitima yanyu mu musengera cyane.”
Videwo yanyujijwe kuri konti ya Kabuye, yagaragazaga yinyagambura ababaye cyane n’icyuma mu nda ndetse n’igikomere ku kuboko.
Mu gihugu cya Uganda, uharanira uburenganzira bwa muntu Frank Mugisha, yavuze ko ibyaha bishingiye ku nzangano nta mwanya bigifite muri Uganda.
Mu butumwa yanyujije ku rubuga rwa X yagize ati: “Turasaba Polisi gukora iperereza ryimbitse.”
Polisi ntacyo irabitangazaho.
