Kubera umukino wa Rayon Sports na APR FC uzaba ku Cyumweru tariki 29 Ukwakira 2023, uwahoze ari rutahizamu wa Rayon Sport Bonfils Caleb yaje kureba uyu mukino agendera mu mbago.
Uyu mukino uzabera kuri Kigali Pele Stadium uzatangira Saa 15:00 uba wahuruje abantu baturutse impande zose mu gihugu no hanze yaho, APR FC ni yo izakira Rayon Sports.
Kubera Bonfils Caleb yagize imvune, akaba atari kwifashishwa n’ikipe akinira ya Al Hilal Bengazi yo muri Libya yahisemo kuza i Kigali kwihera ijisho umukino ukundwa na benshi muri shampiyona y’u Rwanda.
Muri Nzeri 2023 ni bwo Caleb yagize iyi mvune ubwo ikipe ye y’igihugu y’u Burundi yakinaga umukino usoza itsinda wo gushaka itike y’igikombe cya Afurika batsinzwemo na Cameron 3-0.
Uyu mukinnyi yabazwe mu ivi kubera iyi mvune ahabwa imbago, akaba yageze no ku kibuga cy’indege i Kanombe azigenderamo.
Bonfils Caleb ntiyitabiriye uyu mukino wenyine, ahubwo yari kumwe n’itsinda ry’abantu batanu barimo n’umutoza Haringingo Francis watozaga iyi kipe umwaka ushize wa shampiyona.
Bonfils Caleb yakiniye Rayon Sports kuva mu mwaka wa 2017 kugeza 2019.
