Tuesday , 8 April 2025

No products in the cart.

Home AMAKURU Umuyobozi Mukuru wungirije wa Polisi y’u Rwanda DIGP Ujeneza J.Chantal yitabiriye inama ya Interpol muri Angola

AMAKURU

Umuyobozi Mukuru wungirije wa Polisi y’u Rwanda DIGP Ujeneza J.Chantal yitabiriye inama ya Interpol muri Angola

Sam KaberaOctober 4, 20231 Mins read583 Views

Umuyobozi Mukuru Wungirije wa Polisi y’u Rwanda ushinzwe ubutegetsi n’abakozi (DIGP) Jeanne Chantal Ujeneza n’Itsinda ayoboye, bitabiriye inama ya 26 ya Polisi Mpuzamahanga (Interpol) ku mugabane w’Afurika ibera muri Angola.

DIGP Ujeneza n’itsinda ry’intumwa ayoboye zo muri Polisi y’u Rwanda n’Urwego rw’Igihugu rw’Ubugenzacyaha (RIB), bari mu murwa mukuru Luanda, ahateraniye inama y’iminsi itatu, yatangiye kuri uyu wa Kabiri tariki 3 Ukwakira.

Ni inama ihuje abagera ku 160 bakora mu nzego zishinzwe kubahiriza amategeko, ikazigirwamo ingamba zo kurushaho guteza imbere imikorere, imbogamizi bahura na zo no kunoza imikoranire mu rwego rwo guhangana n’ibibazo by’umutekano byugarije umugabane.

Yafunguwe ku mugaragaro na Visi Perezida wa Angola, Esperança Maria Eduardo Francisco da Costa, wagarutse ku kamaro k’ubufatanye bw’inzego zishinzwe iyubahirizwa ry’amategeko mu kurwanya ibyaha byambukiranya umupaka bikomeje kwiyongera.

Mu gihe cy’iminsi itatu bazamara mu biganiro, bazarebera hamwe imirimo ya Polisi Mpuzamahanga ku mugabane w’Afurika, uko ibyaha bihagaze ku mugabane, imiterere yabyo, imikoreshereze y’ikoranabuhanga mu kubika amakuru ku byaha n’ibindi byafasha mu guhangana n’ingaruka z’ibyaha ku mugabane w’Afurika.

Bazungurana ubunararibonye n’ingamba zagiye zifatwa n’ibihugu hagamijwe kurwanya iterabwoba, ibyaha byambukiranya umupaka ndetse n’ubufatanye n’izindi nzego za Polisi hirya no hino ku isi, mu turere tw’Afurika ndetse n’Umuryango w’Afurika yunze Ubumwe.

Previous post Gasabo: Umugabo yaguwe gitumo atetse Kanyanga

Next post Dore itariki umunsi mpuzamahanga wahariwe mwarimu wimuriweho mu Rwanda kuko utakibaye kuwa 5/10 nk'uko bisanzwe

Written by

Sam Kabera

or Message me on 250 783618487 UBUREZI,UBUVUGIZI NIBWO DUSHYIRA IMBERE. Sam Kabera yatangiye itangazamakuru kuva mu mwaka wa 2015 mu binyamakuru birimo Nonaha.com,Hanga.rw n'ibindi bitandukanye birimo na Television.