Umuraperi Tupac Amalu Shakur, ni umuraperi w’umunya-Amerika wamamaye cyane nka 2 Pac, Makaveli, nyuma y’imyaka 27 yitabye Imana hafashwe ukekwaho kuba mu itsinda ry’abamuhitanye.
2 Pac, yishwe ku italiki 16 Nzeri 1996, ku myaka 25 gusa y’amavuko, aho yishwe arashwe, urupfu rwashenguye benshi bigakomeza gutizwa umurindi n’uko n’abamwishe batigeze bafatwa ngo babiryozwe.
Ubu Polisi yo mu mugi wa Las Vegas, USA, yatangaje ko uwitwa Duane’ ‘Keffe D’ ‘ Davis, yamaze gutabwa muri yombi, nyuma y’ imyaka myinshi ari muri 4 bakorwagaho iperereza bakekwaho kwivugana 2Pac.
Ntabwo uyu mugabo bamuhamya icyaha cyo gukurura imbarutso yabaye intandaro yo kwica 2Pac, gusa ngo ni we wari uyoboye itsinda ryamuhitanye.
Davis w’imyaka 60, yatawe muri yombi kuri uyu wa Gatanu taliki 29 Nzeri 2023, aho yari iwe mu rugo, i Las Vegas.
Mu gihe yahamwa n’icyaha nibura yanishwa imyaka 20 y’igifungo.
