Wednesday , 9 April 2025

Umurunga News

No products in the cart.

Umurunga News

Home AMAKURU Nyamasheke: Batawe muri yombi nyuma yo gutega umuntu bakamwambura bakanamukomeretsa.

AMAKURU UBUTABERA UBUZIMA

Nyamasheke: Batawe muri yombi nyuma yo gutega umuntu bakamwambura bakanamukomeretsa.

Sam KaberaSeptember 1, 20232 Mins read965 Views

Polisi y’u Rwanda yongeye kwihanangiriza abagikomeje kwishora mu bujura bagamije kwihesha imitungo y’abandi ko badashobora kwihanganirwa kandi ko ibikorwa byo kubafata bizakomeza gushyirwamo imbaraga.

Ni nyuma y’uko hagiye hakunda kugaragara mu bice bitandukanye, ubujura bukorwa ahanini n’abiganjemo urubyiruko, burangwa no kwambura abaturage imitungo yabo irimo amafaranga, telephone n’ibindi bikoresho by’ikoranabuhanga, rimwe na rimwe bagakomeretsa ba nyirabyo cyangwa bakabavutsa ubuzima.

Mu bujura buherutse, ni aho ku wa Gatatu tariki 30 Kanama, Polisi y’u Rwanda ku bufatanye n’ubuyobozi bw’inzego z’ibanze n’abaturage mu Karere ka Nyamasheke, yafashe abasore babiri bafite imyaka 23 y’amavuko na mugenzi wabo w’imyaka 30, bacyekwaho gutangirira umuturage mu nzira bakamwambura telefone n’ibihumbi 300Frw nyuma yo kumukomeretsa, bakamusiga ari intere.

Umuvugizi wa Polisi mu Ntara y’Iburengerazuba, Superintendent of Police (SP) Bonaventure Twizere Karekezi, yavuze ko kugira ngo abacyekwa bafatwe byaturutse ku makuru yatanzwe n’umuturage wari ugeze aho byabereye.

Yagize ati: “Tukimara guhabwa amakuru ku wa Gatatu saa Mbiri z’ijoro, n’umuturage wasanze uwibwe aryamye mu nzira nyuma yo gukomeretswa n’abantu bataramenyekana, bakamwambura ibihumbi 300Frw na telephone, hahise hatangira ibikorwa byo gushakisha abacyekwa, baza gufatwa mu gicuku hafi saa sita z’ijoro, ubwo bari bavuye mu Kabari ko mu isanteri y’ubucuruzi ya Mwezi.”

Yunzemo ati: “Bakibona abapolisi babagezeho, umwe muri bo yahise ajugunya telefone agamije guhisha ibimenyetso, byaje kugaragara ko ari iy’uwibwe, abapolisi babasatse babasangana 114,900Frw bari basigaranye, n’ibilo 7 by’inyama bari baguze muri ayo mafaranga.”

Biyemereye ko uko ari batatu, bibye umuturage amafaranga batari bakamenya umubare wayo, bamutegeye mu nzira mu mudugudu wa Boli, akagari ka Miko, mu murenge wa Karengera, ngo kuko bari bafite amakuru y’uko yagurishije inka uwo munsi, bigira inama yo kujya kunywera kure mu Kagari ka Mwezi, ari naho bafatiwe baturuka mu gutaha.

SP Karekezi yashimiye uruhare rw’abaturage mu gufatanya n’inzego z’umutekano batanga amakuru kuko bifasha mu kuburizamo ibyaha no gutahura abanyabyaha, abakangurira gukomeza gutanga amakuru ku byo babonye byose byahungabanya umutekano.

Yibukije abacyumva bateze amakiriro ku bujura, guhindura imyumvire, bagashaka imirimo yabateza imbere kuko nta gahenge bazahabwa na Polisi ku bufatanye n’izindi nzego n’abaturage.

Abafashwe n’ibyo bafatanywe bashyikirijwe Urwego rw’Ubugenzacyaha (RIB) kuri sitasiyo ya Karengera kugira ngo hakomeze iperereza ku cyaha bakurikiranyweho.

Ingingo ya 168 y’Itegeko

Nº68/2018 ryo ku wa 30/08/2018

riteganya ibyaha n’ibihano muri rusange ivuga ko kwiba hakoreshejwe kiboko cyangwa ibikangisho bihanishwa igifungo kitari munsi y’imyaka 5 ariko kitarenze imyaka 7 n’ihazabu y’amafaranga y’u Rwanda atari munsi ya miliyoni 3 ariko atarenze miliyoni 5.

Previous post Bamporiki yagizwe umuvunyi ngo igitekerezo iyo akivuze gihabwa agaciro.

Next post Rwamagana: Sheikh Hamdun wakunzwe nabatari bacye yitabye Imana.

Written by

Sam Kabera

or Message me on 250 783618487 UBUREZI,UBUVUGIZI NIBWO DUSHYIRA IMBERE. Sam Kabera yatangiye itangazamakuru kuva mu mwaka wa 2015 mu binyamakuru birimo Nonaha.com,Hanga.rw n'ibindi bitandukanye birimo na Television.