Ibi byabaye uyu munsi taliki 06 Kanama 2023,ahazwi nko kwa Gahiga, mu mudugudu wa Gicuba, akagali ka Kibuye, mu murenge wa Bwishyura ho mu karere ka Karongi, gusa ngo nyakwigendera akomoka mu karere ka Muhanga.
Uyu ni Manzi Constance Rida,24, aho yatoraguwe n’inzego z’umutekano zo mu karere ka Karongi yamaze gushiramo umwuka.
Uyu Manzi Constance, nko bigaragara ko yari mwene Musemakweli na Mutesi Rashel batuye mu Karere ka Muhanga, mu murenge wa Nyamabuye.
Uru rupfu ngo rwagize ingaruka zikomeye ku muryango we ngo kuko nyina umubyara kugeza ubu aracyari mu bitaro aho yajyanywe nyuma yo kugwa igihumure akagwa muri coma, yatewe n’uko byamugoye kwakira iyi nkuru, akaba acyitabwaho n’abaganga.
Umuseke twavomyeho iyi nkuru, watangaje ko uyu nyakwigendera atari wenyine ngo kuko yari kumwe n’abandi babiri barimo uwitwa Kabeja Gahinga, 19, na Jesca Ngabo, 27.
Ngo bashidutse babona umuntu areremba hejuru y’amazi, kuko bo bari imusozi, bagiye kumukuramo basanga yashizemo umwuka.
Mu gihe iperereza rigikomeje, ngo harakekwa ko intandaro y’urupfu rwa nyakwigendera rwaba rwatewe no kuba atari afite ubumenyi mu koga, gusa iperereza ntabwo rirabihamya.
Mu gihe inzego zitandukanye,by’umwihariko izishinzwe umutekano, POLICE, n’iz’ubugenzacyaha, RIB, zahise zigera aho byabereye, zikajyana umurambo ku bitaro bya Kibuye kugira ngo ukorerwe isuzuma, nta cyo RIB cyangwa Polisi birabitangazaho.
