Kuri uyu wa Kane taliki 02 Ukwakira 2025, mu murenge wa Muhura, mu karere ka Gatsibo hafunguwe ku mugaragaro icyumba cy’ikoranabuhanga kizwi ku izina ry’Icyumba Mpahabwenge.
Umuyobozi ushinzwe ibikorwa muri RISA, Bwana Asiimwe Innocent, ari kumwe n’abayobozi b’Akarere ka Gatsibo, Minisiteri y’Ikoranabuhanga na Inovasiyo (MINICT), Minisiteri y’Ubutegetsi bw’Igihugu (MINALOC) ndetse n’umufatanyabikorwa KOICA, batangije ku mugaragaro icyumba cy’Ikoranabuhanga mu rwego rwo kwegereza abaturage serivisi z’ikoranabuhanga, (Service Access Point – SAP).
Iki cyumba giherereye mu Murenge wa Muhura, Akarere ka Gatsibo.
Iki cyumba kije gikurikira ibindi bine biherutse gufungurwa mu Turere dutandukanye nka Ruhango (Kinazi), Rutsiro (Mushubati), Burera (Nemba) na Kayonza (Rukara). Iki cyumba kikaba cyuzuye gitwaye arenga Miliyoni 80 z’amafaranga y’u Rwanda.
Ibi byumba byose byahawe ibikoresho bishya by’ikoranabuhanga hagamijwe kugeza serivisi z’ikoranabuhanga hafi y’abaturage no guteza imbere ikoranabuhanga hirya no hino mu gihugu.
Iyo ugeze muri iki cyumba uhasanga ibikoresho nk’ama-laptops, internet, integanyanyigisho zifashisha ikoranabuhanga (smart boards), ndetse n’abakozi bahawe amahugurwa bazafasha abaturage kubona serivisi za e-Government.
Ibi byose bikazafasha abaturage kwiga ubumenyi bushingiye ku ikoranabuhanga no kubona amahirwe ajyanye n’ubukungu bushingiye ku ikoranabuhanga.
Bwana Gasana Richard umuyobozi w’akarere ka Gatsibo yasabye abaturage kwitabira iki cyumba cyane ko ari ubuntu kandi ntawuhejwe, byumwihariko bisabira serivisi za Leta ku rubuga rw’Irembo nko kwiyishyurira Mituweli, imisoro, gusaba serivisi za polisi bidasabye gukora ingendo bajya gushaka izo serivisi ndetse no kongera ubumenyi ku ikoranabuhanga.
Ibi byumba byitezweho ko bizagira uruhare runini mu gukuraho icyuho mu ikoranabuhanga, kongera imitangire ya serivisi zishingiye ku ikoranabuhanga, ndetse no gushyigikira intego za NST2 hamwe n’icyerekezo cy’igihugu cyo kuba ubukungu bushingiye ku bumenyi bw’ikoranabuhanga.
