Muhanga: RIB yataye muri yombi umukozi w’umurenge

Kuri uyu wa Mbere Taliki 29 Nzeri 2025, Urwego rw’Ubugenzacyaha, RIB, rwataye muri yombi umukozi ushinzwe serivisi z’ubutaka mu Murenge wa Rugendabari, Ndacyayisaba Ildephonse, akurikiranyweho kunyereza amafaranga ya Leta.
‎
‎Amakuru avuga ko uyu mukozi wari ushinzwe ubutaka mu Murenge wa Kibangu, nyuma akimurirwa mu Murenge wa Rugendabari ari naho yafatiwe, yandikwagaho za Sheki zitandukanye ahawe na Gitifu w’Umurenge.
‎
‎Ayo mafaranga ngo yayabikuzaga muri Banki adafite ibisobanuro n’impapuro zibikwa mu biro by’Umucungamali.
‎
‎Ubwo hakorwaga igenzura ry’abakozi b’Akarere ka Muhanga, nibwo ayo manyanga yatahuwe, babasha gutahura ko hari miliyoni zirenga ebyiri z’amafaranga y’u Rwanda, zanditse mu mazina ya Ndacyayisaba Ildephonse bamusabye ibisobanuro arabibura.
‎
‎Bivugwa ko aho Gitifu w’Umurenge wa Kibangu, Mukamutali Valerie n’umucungamali w’uyu Murenge bafatiwe, Akarere kahise kohereza Ndacyayisenga gukorera mu Murenge wa Rugendabari kugira ngo adakomeza gusibanganya ibimenyetso.
‎
‎Umwe muri abo bakozi yagize ati: “Niwe wasaga n’uyoboye Umurenge kuko ntacyo Gitifu yakoraga Ndacyayisaba atacyemeje.”
‎
‎
‎Amakuru avuga ko nyuma y’itabwa muri yombi rya Gitifu w’Umurenge Mukamutali Valerie n’Umucungamali witwa Munyampundu Védaste, muri uyu Murenge inzego zishinzwe iperereza zatangiye gukora akazi kazo.
‎
‎Bivugwa ko iri perereza ryakozwe n’abarimo, Umushinjacyaha ku rwego Rwisumbuye rwa Muhanga, abunganizi babiri mu mategeko ba Gitifu w’Umurenge, Umukozi wa RIB, Abagenzuzi batatu b’Akarere ka Muhanga ndetse na Polisi nkuko bivugwa.
‎
‎Bikavugwa ko izo nzego zasanze muri uyu Murenge harakozwe amanyanga menshi kandi adafitiwe ibisobanuro.
‎
‎Umuseke dukesha iyi nkuru bavuga ko bagerageje kumenya icyo RIB ivuga kuri iki kibazo, gusa ubwo twakoraga iyi nkuru, Umuvugizi wa RIB yari atarasubiza ubutumwa bamwandikiye nkuko babitangaje.
‎