Guverineri w’Intara y’Iburasirazuba, Pudence Rubingisa, yavuze ko ibibazo by’imiryango birimo abana bata ishuri n’abangavu baterwa inda bikomeje kuba imbogamizi ikomeye ku iterambere ry’iyi Ntara.
Ibi yabigarutseho mu mwiherero w’iminsi ibiri wahuye abayobozi batandukanye barimo abayobozi b’uturere, abagize komite nyobozi, abaperezida b’inama njyanama ndetse n’abahagarariye ibigo bya Leta bikorera mu Ntara y’Iburasirazuba. Uyu mwiherero wabereye mu Murenge wa Rwinkwavu, wari ufite insanganyamatsiko igira iti “Umuturage ku isonga: Inshingano n’indangagaciro z’umuyobozi.”
Ibibazo by’imiryango ku isonga
Guverineri Rubingisa yasobanuye ko mu byo baganiriyeho, ahanini byibanze ku bibazo byo mu muryango birimo amakimbirane, abana bata ishuri bakajyanwa mu mirimo itemewe, ndetse n’abakobwa baterwa inda imburagihe.
Yagize ati:
“Nubwo imibare y’abana bata ishuri cyangwa baterwa inda itari myinshi cyane, turabifata nk’ikibazo gikomeye kuko aba bana baba bari aho batagomba kuba. Niyo mpamvu tugomba kubafasha ariko kandi tugakurikirana n’ababigiramo uruhare kugira ngo babibazwe.”
Guverineri yavuze ko ibi bibazo ari byo bitera izindi ngorane mu muryango, bikabuza abaturage gufatanya mu bikorwa bibateza imbere.
Gahunda yo gukorera hamwe
Umuyobozi w’Akarere ka Gatsibo, Gasana Richard, yavuze ko uyu mwiherero wabahaye isomo ryo gukorera hamwe nk’inzego zitandukanye.
Yagize ati:
“Twabonye ko dukwiye gukoresha inzego zose kuva ku rwego rw’isibo kugeza ku rwego rw’akarere. Twese tugomba gukorana kugira ngo ibibazo by’abaturage bikemuke.”
Gasana yavuze ko buri karere kamuritse udushya kagezeho, ku buryo byafasha abandi bayobozi kwigira ku byiza byabaye ahandi.
Imyanzuro yafashwe
Muri uyu mwiherero hafatiwemo imyanzuro ikomeye irimo:
Gukomeza gukora cyane no guhanga udushya mu gukemura ibibazo byugarije abaturage.
Kubaka ubushobozi bw’abakozi mu nzego zose.
Gukorera mu buryo bw’ikipe kugira ngo gahunda za Leta zishyirwe mu bikorwa vuba.
Kongera imbaraga mu gutanga serivisi nziza ku baturage.
Gukoresha ikoranabuhanga mu gukusanya amakuru no gupima intambwe iterwa mu bikorwa.
Guverineri Rubingisa yasabye abayobozi bose gukorera hamwe kugira ngo umuturage agire uruhare mu iterambere ry’Intara, kandi ibibazo by’imiryango bigabanuke.
