FARDC yongeye gusakirana na Wazalendo

Mu Ntara ya Kivu y’Amajyepfo muri Repubulika Iharanira Demokarasi ya Congo, haravugwa imirwano yahanganishije ingabo z’iki gihugu n’umutwe witwaje intwaro wa Mai Mai ubarizwa mu ihuriro Wazalendo bisanzwe bifatanya kurwanya AFC/M23.

Ikinyamakuru Actualité cyo muri RDC cyatangaje ko iyi mirwano yo mu gitondo cyo kuri uyu wa Kane taliki 01 Gicurasi 2025, yabereye mu gace ka Kasenga na Kakombe muri Teritwari ya Uvira.

Bamwe mu baturage bo muri utwo duce batangaje ko impande zombi zipfa uduce zishaka kugenzura, kuko mbere yo gukozanyaho ngo ingabo FARDC zari zabanje kwinjira muri utu mu gihe Wazalendo na yo ishaka kutugenzura.

Umwe muri abo baturage yagize ati: “Kuva ejo ku mugoroba, twabonye abasirikare ba FARDC bajya ku bwinshi muri Kakombe na Kasenga. Kuva mu gitondo, batangiye kurasana na Wazalendo.”

Bakomeza basobanura ko imirwano yatangiriye muri Kasenga mu masaa kumi n’imwe, ikomereza mu yindi misozi yo muri Uvira mu masaa yine.

Ku wa 25 Mata 2025, Wazalendo yagabye ibitero bikomeye ku ngabo za RDC, bitewe no kutumvikana ku buryo impande zombi zigomba kwitwara ku rugamba rwo kurwanya ihuriro AFC/M23.

Icyo gihe, Lt Marc Elongo, Umuvugizi w’ibikorwa bya FARDC, yasobanuye ko Wazalendo yarakajwe n’uko abasirikare ba Leta bavuye mu birindiro bari bafite muri Katongo, bakajya muri Teritwari ya Fizi.

FARDC ihanganye na Wazalendo byafatanyaga kurwanya AFC/M23, mu gihe ku wa 23 Mata 2025, Leta ya RDC na AFC/M23 byasinyiye i Doha muri Qatar amasezerano yo guhagarika imirwano kugira ngo ibiganiro by’amahoro bibe mu mwuka mwiza.

Ni mu gihe abahagarariye Wazalendo muri Kivu ya Ruguru bo bagaragaza ko batishimiye ibi biganiro, kuko ngo na bo bakabaye babyitabira. Ikindi ngo hari abatumva uburyo Leta ya Kinshasa iganira n’Ihuriro Alliance Fleauve Congo ribarizwamo M23.

Assa Pakuru, usanzwe uhuza ibikorwa bya Wazalendo muri Kivu ya Ruguru, yavuze ko bafite impungenge z’uko abarwanyi ba AFC/M23 bazinjizwa mu gisirikare cy’igihugu.