FARDC na Wazalendo byagerageje kwigarurira Santere ya Nzibira basanga AFC/M23 iri maso

Ingabo za Repubulika Iharanira Demokarasi ya Congo n’ihuriro ry’imitwe ya Wazalendo byateguye igitero cyo kwigarurira Santere ya Nzibira iherereye muri Teritware ya Walungu mu Ntara ya Kivu y’Amajyepfo, basanga Ihuriro rya Alliance Fleuve Congo, AFC ribarizwamo umutwe wa M23 riri maso.
‎
‎Ku wa 21 Nzeri 2025, abarwanyi ba AFC/M23 bigaruriye Santere ya Nzibira mu rwego rwo gukumira ibitero bya hato na hato Ingabo za RDC na Wazalendo byaturukaga muri aka gace no mu bindi bihana imbibi.
‎
‎Icyo gihe ingabo za RDC na Wazalendo byasobanuye ko byavuye muri santere ya Nzibira mu rwego rwo kwirinda ko hagira amaraso y’abaturage yameneka.
‎
‎Ku wa 29 Nzeri, FARDC na Wazalendo byatangije igitero gikomeye muri Nzibira no mu bice bihana imbibi nka Mulunga, Chirwa, Nyamarhege, Mulamba na Kaniola, bagamije kuhirukana abarwanyi ba M23.
‎
‎Bamwe mu baturage batuye muri Santere ya Nzibira batangaje ko bahinze umushyitsi kubera urusaku rwinshi rw’imbunda ziremereye rwumvikanye muri iyi Santere no mu tundi duce tuhegereye.
‎
‎Umwe mu bayobozi bo muri Walungu yagize ati: “Inyeshyamba za M23 ziri kwirwanaho bikomeye zikoresheje intwaro ziremereye kandi abaturage bafite ubwoba n’urujijo.”
‎
‎M23 yasubije inyuma igitero cy’ingabo za FARDC na Wazalendo, bihungira mu ntera igera kuri kilometero 20, mu duce turimo Culwe, Lubimbe na Ngando.
‎
‎Abasirikare ba FARDC bari kwifashisha indege z’intambara, drones za CH-4 n’intwaro ziremereye ariko M23 ikora ibishoboka byose igakumira ibitero bikiri kure yifashishije intwaro nazo ziremereye yambuye abarwanyi b’Ihuriro rya Leta.