Gen Maj Sultani Makenga, uyobora abarwanyi babarizwa mu Ihuriro rya Alliance Fleuve Congo, AFC ribarizwamo umutwe wa M23, yatangaje ko bafite intego yo gukura Perezida Félix Tshisekedi ku butegetsi.
Ibi yabitangaje Taliki 01 Ukwakira 2025, ubwo yahaga ubutumwa abasirikare bashya barenga ibihumbi 9000, bari amaze igihe batorezwa mu kigo cy’imyitozo ya gisirikare cya Tchanzu, giherereye muri Teritware ya Rutshuru mu Ntara ya Kivu y’Amajyaruguru.
Gen Maj Makenga yavuze ko impamvu AFC/M23 ishaka guhirika ubutegetsi bwa Tshisekedi ari uko bwasenye igihugu, bwica abaturage bubaziza ubwoko bwabo, abandi barahunga.
Yagize ati: “Ni yo mpamvu AFC/M23 yahagurutse kugira ngo ikureho ubu butegetsi bubi, izane impinduka mu gihugu cyacu.”
Gen Makenga aha ubutumwa izo ngabo, yavuze ko bagenzi babo bari ku rugamba bakoze akazi gakomeye, abamenyesha ko nibatangira akazi bazifatanya kugira ngo bagere ku ntego yo gusenya ubu butegetsi bubi buriho.
Akomeza agira ati: “Igihugu cyacu gikeneye kubohorwa, Abanyekongo bakeneye kubohorwa kandi iyo ni yo ntego ya AFC/M23.”
Ni mu gihe ku wa 04 Ukwakira 2025, ubwo Perezida Tshisekedi, yaganiraga n’urubyiruko yavuze ko afite intego yo kwisubiza ibice byafashwe n’abarwanyi ba AFC/M23 birimo umujyi wa Goma, Bukavu, ibyo muri Teritwari ya Rutshuru na Masisi, akongera akabyubaka.
Icyo gihe yagize ati: “Mu gihe ubutaka bwanyu buzaba bubohowe, tuzatangiza gahunda ya ngombwa yo kongera kubaka no gutunganya imihanda, amashuri, ibigo nderabuzima, tubagezeho ingufu na serivisi z’ikoranabuhanga.”
Impande zombi zifite izi ntego mu gihe Leta ya Qatar ikomeje gukora ibishoboka kugira ngo izumvikanishe, hashingiwe ku mahame zashyizeho umukono Taliki 29 Nyakanga, yitezweho kuzifasha kugera ku mahoro arambye.
Nubwo hari gahunda y’amahoro ya Qatar, impande zombi zikomeje kwitegura intambara karundura, binyuze mu kubaka ubushobozi bushingiye ku kongera abasirikare n’abarwanyi, intwaro n’ibindi bikoresho bya gisirikare.
Trending
- Rutsiro:Umucungamutungo mu rw’unge rw’amashuri rw GS Rwingongo Tss yatawe muri yombi
- U Rwanda rurushaho guteza imbere abarimu bita ku bana bafite ubumuga – MINEDUC
- Mwalimu Clement wari uzwi mu kwigisha imodoka yiyahuye muri Muhazi
- Kinshasa: Umusirikare mukuru wari witezweho kurandura M23 yafunzwe
- Incamake kuri Maj. Thomas Ritchie umwera wa mbere winjiye muri RDF
- Mali:Umukobwa wakoreshaga TikTok ashyigikira igisirikare yiciwe mu ruhame
- Ngororero: Umubyeyi yabyariye mu modoka itwara abagenzi
- REB yashyize mu myanya abarimu barangije amasomo kuri buruse ya Leta
