Ruhango: Polisi yafunze umukecuru nyuma y’uko mu rugo rwe haguye umugabo wari wahaje ngo amusengere

Umukecuru w’imyaka 60 y’amavuko wo mu Karere ka Ruhango mu Murenge wa Ruhango, yatawe muri yombi na Polisi, nyuma y’uko mu rugo rwe hapfiriye umugabo w’imyaka 29 y’amavuko bivugwa ko yari yahaje ngo uwo mukecuru amusengere.

Abaturanyi b’uwo mukecuru bavuga ko ku wa Kabiri taliki 19 Ugushyingo 2024, babonye uwo nyakwigendera azanywe n’umugore mu rugo rw’uwo mukecuru, usanzwe asengera abantu bafite ibibazo.

Umwe muri bo yagize ati: “Uwo mukecuru yari umurokore noneho twabonye bamuzaniye uwo mugabo ngo amusengere ariko ngo yari asanzwe arwaye. Bakimugeza hano baramusengeye nyuma arapfa ariko twahageze yapfuye. Ntabwo tuzi icyamwishe ariko ubwo yari afite ikimurimo kuko ntabwo umuntu yaza ari muzima ngo ahite apfa.”

Bongeyeho ko uwo mukecuru yari asanzwe asengera abantu barwaye rimwe na rimwe bokorohewe cyangwa bagakira ariko hakaba nta rusengero rwari rusanzwe ruhari.

SP Habiyaremye Emmanuel , uvugira Polisi y’u Rwanda mu Ntara y’Amajyepfo, yahamije aya makuru avuga ko  ukekwa yamaze gutabwa muri yombi.

Yagize ati: “Hafashwe ukekwa ari we nyiri urugo ubu afungiye kuri Sitasiyo ya Polisi ya Ruhango. Iperereza rirakomeje naho umurambo wajyanywe ku Bitaro bya Gitwe.”

Hari andi makuru avuga ko ubuyobozi bw’inzego z’ibanze bwari bwarabujije uyu mukecuru gusengera abantu mu rugo kuko bitemewe, ariko we akomeza kubikora.

Src: TV1 Rwanda