Muri Teritwari ya Masisi i Sake, haraturuka amakuru avuga ko ingabo za Repubulika Iharanira Demokarasi ya Congo ziryamiye amajanja, mu rwego rwo kwitegura imirwano karahabutaka ikomeje kuzisakiranya n’Ingabo zo mu mutwe wa M23.
Nyuma y’ibisasu impande zombi zari zagiye zihererekanya ku Cyumweru taliki 17 Ugushyingo 2024, ejo hashize ku wa Mbere muri uriya mujyi hiriwe agahenge.
Magingo aya biravugwa ko umutwe wa M23 ukomeje kongera ingabo mu bice by’imisozi ikikije Sake igenzura, ku buryo isaha n’isaha ishobora kurasa kuri uyu mujyi.
Kuva muri Gashyantare kugeza muri Kamena 2024, imirwano ikomeye yasakiranyaga ihuriro ry’ingabo za Leta ya Repubulika Iharanira Demokarasi ya Congo na M23 i Sake, gusa inyeshyamba zanga kwinjira muri uyu mujyi ahubwo zifata ibindi bice biwukikije birimo na Minova.
Kuri ubu ntibiramenyekana niba izi nyeshyamba ziyobowe na Gen Sultani Makenga zaba ziteganya kwigarurira burundu uriya mujyi ufatwa nk’ikiraro gihuza intara za Kivu zombi.
