Uwitwa Harindintwari Niyongana Innocent w’imyaka 69 y’amavuko nyuma y’imyaka myinshi yihisha ubutabera kubera ibyaha bya Jenoside yakorewe Abatutsi 1994 akurikiranyweho, yafatiwe mu Karere ka Kirehe ku mupaka wa Rusumo.
Uyu mugabo ukomoka mu Karere ka Gisagara, Umurenge wa Muganza, Akagari ka Rwamiko ho mu Mudugudu wa Akarubumba,yaje avuga ko atahutse avuye mu gihugu cya Malawi aho yakoreraga ubucuruzi kuva mu mwaka wa 2009.
Umuvugizi wa Polisi mu Ntara y’Iburasirazuba, SP Hamdun Twizeyimana, yavuze ko aya makuru uyu mugabo yatanze atari ukuri kuko mu mwaka wa 2006, urukiko Gacaca rwo mu Murenge wa Muganza mu Karere ka Gisagara, rwamuhamije ibyaha bya Jenoside yakorewe Abatutsi 1994, rumukatira igifungo cy’imyaka 25 kubera uruhare yagize muri Jenoside.
Yagize ati: “Mu makuru yatanze we ubwe, yavuze ko yakatiwe na Gacaca ariko ahungutse aje mu gihugu avuye muri Malawi aho yakoreraga ubucuruzi, ubu inzego z’umutekano zamucumbikiye kuri sitasiyo ya RIB Kirehe kugira ngo azakurikiranwe kuri ibyo byaha.”
Harindintwari yakatiwe n’inkiko Gacaca mu mwaka wa 2006, akomeza kwihishahisha aza kuva mu Rwanda mu mwaka wa 2009 abanza guca muri Tanzania akomereza muri Malawi.
