Umutoza wa AS Kigali WFC, Ntagisanimana Saida yafatiwe ibihano n’Ishyirahamwe ry’Umupira w’Amaguru FERWAFA, kubera imyitwarire mibi yamugaragayeho ku mukino wa ½ wo kwishyura w’Igikombe cy’Amahoro uheruka guhuza Rayon Sports WFC na AS Kigali WFC.
Uyu mukino wari wahuje amakipe yombi mu mukino wo kwishyura w’Igikombe cy’Amahoro wabaye taliki 24 Mata 2024, AS Kigali WFC yarasezerewe, nibwo Ntagisanimana Saida yakubise urushyi Rwaka Claude washaka kumusuhuza umukino urangiye undi atabishaka.
Ku wa Gatanu taliki 26 Mata 2024 FERWAFA yahise itumiza abo batoza bombi, bamenyeshwa ko ku wa Gatandatu taliki 27 Mata 2024, bagomba kwitaba Akanama gashinzwe Imyitwarire.
Ubunyamabanga bwa FERWAFA bwandikiye Ntagisanimana Saida ko ahagaritswe imikino itatu uhereye igihe abimenyesherejwe, ariko bitabujijwe ko Akanama gashinzwe Imyitwarire gashobora kuzamuha ibindi bihano.
FERWAFA yihutiye guhagarika uyu mutoza, mu gihe AS Kigali WFC ifitanye umukino wo guhatanira umwanya wa gatatu mu gikombe cy’Amahoro na Fatima WFC, uteganyijwe kuzaba ku wa Kabiri, uzabera kuri Tapis Rouge.
Ibi bivuze ko uyu mutoza ashobora kuzagaruka umwaka utaha w’imikino kuko na shampiyona yamaze gushyirwaho akadomo.
Ntagisanimana Saida yagizwe umutoza mukuru wa AS Kigali WFC, kuva muri Gashyantare nyuma y’iyirukanwa rya Mukamusonera Théogenie yari abereye umwungiriza.
