Mu gihe ikipe ya Police FC ikomeje kubura umusaruro mu kibuga umutoza Mashami Vincent igihe icyo ari cyo cyose yakwerekwa umuryango.
Nyuma yo gutangira akomerwa amashyi muri Shampiyona y’icyiciro cya mbere mu Rwanda, Mashami Vincent, umutoza wa Police FC, icyizere cye cyagiye kiraza amasinde, kugeza aho ikipe yahabwaga amahirwe yo kwegukana igikombe cya Shampiyona, ari no mu murongo utukura uva mu gikombe cy’Amahoro.
Mu mikino ibanza ya shampiyona Mashami yagerageje kwitwara neza, gusa mu mikino yo kwishyura imikino yaramushaririye aho mu mikino 11 yatsinzwemo 7, anganya 2, atsinda ibiri, ibintu bitashimishije abapolisi.
Mu masezerano ya Mashami Vincent, harimo ko nibura agomba gutwara igikombe 1, amakuru ahari ahuzwa n’umusaruro arimo gutanga, ni uko yagakwiye kuba atakibarizwa muri Police FC, gusa kuba agifite akaguru kamwe mu gikombe cy’Amahoro bihuzwa n’amasezerano ko agomba gutwara igikombe kimwe, bityo aracyafite amahirwe yo kwegukana igikombe cy’Amahoro gusa nyuma yo gutsindwa umukino ubanza na Gasogi United, iramutse imusezereye yahita yerekwa umuryango nta gihindutse.
Mbere y’umukino ubanza wa 1/2, mu gikombe cy’Amahoro, na Gasogi United, Mashami ngo yari yabwiwe n’ubuyobozi ko niyaramuka asezerewe nawe yahita yegura kuko bitakoroha ko akomeza gutoza imikino isigaye.
Mashami Vincent watsinzwe umukino ubanza na Gasogi United, igitego 1-0, byaba bimurangiranye aramutse atisubiyeho ngo atsinde kandi asezerere Gasogi United mu mukino wo kwishyura agere ku mukino wa nyuma yemwe anatware igikombe cy’Amahoro.
Mashami Vincent yigeze gutoza ikipe y’igihugu Amavubi aho yavuye yerekeza muri Police FC, muri Nyakanga 2022, muri uyu mwaka wa Shampiyona ubu ari ku mwanya wa Gatanu n’amanota 39, aho arushwa na APR FC ya mbere amanota 21.
