Nyuma y’urugendo rurerure amakipe y’abanyeshuri y’abatarengeje imyaka 16 yanyuzemo, guhera mu majonjora atandukanye, amakipe ya GS CYICIRO mu bakobwa na College Ste Marie Reine mu bahungu niyo azahagararira Akarere ka Muhanga.
Imikino ya nyuma yabaye kuri uyu wa Gatanu tariki ya 22 Werurwe, ku bibuga bya Kabgayi ndetse na Sitade ya Muhanga.
Ikipe ya GS CYICIRO, ishuri riherereye mu Murenge wa Nyarusange, ryageze kuri iyi ntsinzi nyuma yo guhigika ikipe ya GS RUBUGURIZO ku bitego 2 ku 0 muri 1/2 maze ku mukino wa nyuma isezerera ikipe ya GS KIVUMU ku bitego 2 ku 0.
Mu bahungu ikipe y’ishuri rya College Ste Marie Reine riherereye mu Murenge wa Nyamabuye niyo yatsindiye itike yo gusohokera Akarere ka Muhanga nyuma yo kunyagira amakipe ya St Etienne 3 ku 0, GS KANYANZA 5 ku 0 na GS KIVUMU 4 kuri 1 ku mukino wa nyuma.
Ikipe ya Ste Marie Reine yagaragaje ubusatirizi bukomeye yinjiza ibitego 12 mu mikino 3. Ndetse n’ubwugarizi butoroshye aho bwinjijwe igitego kimwe gusa mu mikino 3 iheruka.
