Ubwato bwari buvuye mu Mujyi i Goma bwerekeje mu Ntara ya Kivu y’Amajyepfo bujyanye imiti i Minova, bwatewe ibisasu biremereye.
Aya makuru yamenyekanye kuri uyu wa Gatanu taliki 15 Werurwe 2024.
Sosiyeti sivile yo muri aka gace yatangaje ko ubwato bwatewe ibisasu ari ubwa Kompanyi yitwa Baraka, bivugwa ko ibi bisasu byatewe biturutse muri Teritwari ya Masisi mu misozi ya Ndumba.
Bivugwa ko ubu bwato bwari butwaye abagenzi, ariko bunatwaye imiti yo gufasha abasirikare ba FARDC, bakomerekeye ku rugamba igisirikare cya Congo gihanganyemo n’umutwe wa M23.
Iyi miti yagombaga koherezwa i Minova, havurirwa abasirikare ba FARDC, Ingabo z’u Burundi, FRLR na Wazalendo.
Amakuru kandi avuga ko icyo gitero nta muntu wakiguyemo, uretse ubwato bwangiritse ku buryo bukabije.
Ni mu gihe ahari hasanzwe habera imirwano muri Kivu y’Amajyaruguru hamaze iminsi humvikana igisa nk’agahenge, gusa kuri ubu haravugwa ibitero bitunguranye, ndetse ngo FARDC ikomeje guhunga yerekeza i Beni no muduce twa Butembo, abandi bagahunga berekeza muri Kivu y’Amajyepfo.
