Umwarimu uzajya yimurwa ku ishuri yakoreragaho akajyanwa ku rindi ku nyungu z’akazi azajya agenerwa imodoka yo kumwimura. Ibi bikubiye mu ibaruwa No 0294/12.00/2024 yo ku wa 02/02/2024 Minisiteri y’uburezi yandikiye uturere n’umujyi wa Kigali ibagira inama.
Bwana Umuyobozi w’Umujyi wa Kigali
Bwana/Madamu Umuyobozi w’Akarere (Bose)
Impamvu: Gutanga inama ku bijyanye n’amafaranga ahabwa umwarimu wimuwe ku bw’inyungu
z’akazi atabisabye.
Bwana/Madamu,
Nshingiye ku Iteka rya Perezida No 064/01 ryo ku wa 16/03/2020 rishyiraho sitati yihariye
igenga abarimu b’amashuri y’incuke, abanza, ayisumbuye n’ayimyuga n’ubumenyingiro, mu ngingo yaryo ya 55 igika cyayo cya 2 iteganya ko: Amafaranga yo kwimuka ku mwarimu wimuwe abisabwe n’umukoresha atangwa n’umukoresha. Minisitiri ufite uburezi mu nshingano agena
ingano y’ayo mafaranga n’uburyo atangwa.
Maze gusuzuma imiterere y’amashuri yose ndetse n’uburyo bwo gutwara abagenzi muri rusange ngasanga bitoroshye ko umwarimu yahabwa amafaranga amwimura kuko bitamworohera mu ngendo bitewe naho ishuri ryaba riherereye;
Nshingiye ku mpamvu zivuzwe haruguru, ngasanga kugena ingano y’amafaranga yahabwa umwarimu wimuwe bitoroshye kubera imiterere ya buri Karere n’aho umwarimu yaba yimuriwe;
nkwandikiye ngusaba ko, umwarimu wimuwe ku bw’inyungu z’akazi, yagenerwa imodoka imwimura ikamugeza ku ishuri yimuriweho, ibyo kandi byamufasha kubona uko yashobora kwimukana bimwe mu bikoresho nkenerwa by’ingenzi byamufasha mu mibereho ye.
Mugire amahoro.
