Umutwe wa M23 urashinjwa n’Igisirikare cya Congo, kurasa ibisasu mu gace ka Sake kaberamo imirwano, mu rwego rwo kuburizamo uruzindiko abagaba bakuru b’ingabo zihanganye na M23 bari bahagariye.
Gen. Sylvain Ekenge, yavuze ko iby’uru ruzindiko abagaba bakuru bagiriye i Sake na M23 yari yabimenye, ikarasayo amabombe atanu, ariko ntibyahagarika uruzindiko.
Yagize ati: “Ni saa kumi n’iminota 15 (16h15) baracyahari, abamaze kwiga ku ngamba zo kurangiza ibikorwa by’iterabwoba bya M23.”
Amakuru avuga ko ibyo bibombe byaguye mu kigo cya Mubambiro, bigahitana abantu batatu ndetse bigakomeretsa abandi babiri.
Abasuye ako gace ko mu Burasirazuba bwa RD Congo, barimo umugaba mukuru w’Ingabo za Tanzania, Gen. Jacob John Mkunda, uw’ingabo za Malawi, Maj. Gen Kashisha, umugaba w’ingabo za Afurika y’Epfo, Gen. Maphwanya na Gen. Prime Niyongabo w’u Burundi ndetse n’umugaba mukuru w’Ingabo za RD Congo, Gen. Christian Tshiwewe.
M23 ntacyo iratangaza kuri ibi birego, ariko nticana uwaka n’ingabo za SADC kuko zahagurutse zije guhangana nayo.
Uyu mutwe uheruka kandi gushinjwa kurasa ku ngabo za Tanzania zikambitse muri Masisi i Sake, hagakomereka abasirikare babiri bazo n’umuturage umwe.
