Ibihugu bya mbere bikize ku isi ntibivuga rumwe ku mari y’Uburusiya byafatiriye niba bigomba kuyiha Ukraine.
Ba Minisitiri b’imari, abayobozi ba banki nkuru z’ibihugu 20 bya mbere bikize ku isi, G20, n’abakuru ba Banki y’isi yose, Ikigega mpuzamahanga cy’imari, na Banki nkuru y’Umuryango w’ubumwe bw’Ubulayi, n’Umuryango w’Afrika yunze ubumwe bateraniye mu nama ngarukamwaka yabo mu Mujyi wa Sao Paulo muri Brezille. Kuri gahunda yabo harimo n’ikibazo cy’ihindagurika ry’ibihe n’icy’ubukene bukabije. Nyamara intambara yo muri Ukraine yihariye umwanya munini.
Bityo, ku ruhande rw’iyi nama, abahagarariye ibihugu bya G7 birindwi bya mbere bikize muri ibi 20, hinyongereyeho n’Umuryango w’ubumwe bw’Uburayi, nabo bakoze inama yabo yihariye. Minisitiri w’imari wa Leta zunze Ubumwe z’Amerika, Janet Yellen, yabasabye n’ingufu nyinshi ko bagobotora byihutirwa imari y’Uburusiya bafatiriye, igera ku madolari miliyari 397, kugirango bazayashyire mu bikorwa byo gusana no kongera kubaka Ukraine.
Yasobanuye ko yemera ko “hariho amategeko mpuzamahanga akomeye abyemera.” Ati: “Byaba ari igisubizo nyacyo ku ntambara Uburusiya bwagabye kuri Ukraine buyisagariye, kugirango bwumve neza ko bugomba kwemera kwicara ku meza y’imishyikirano y’amahoro na Ukraine.”
Inkuru dukesha Ijwi ry’Amerika ivuga ko Kanada ari kimwe mu bishyigikiye igitekerezo cya Leta zunze ubumwe z’Amerika. Ariko bagenzi babo bamwe na bamwe si ko babibona. Minisitiri w’imari w’Ubufaransa, Bruno Le Maire, yateyeye utwatsi ku mugaragaro igitekerezo ya mugenzi we w’Amerika. Ati: “Twe nta ngingo n’imwe ifatika tubona mu mategeko mpuzamahanga ibitwemerera. Dukwiye kubyigaho neza kandi abagize G20 bose bakabishyigikira.” Uburusiya n’Ubushinwa (batavuga rumwe na gato n’Amerika) n’Ubuhinde nabo bari muri G20, ariko ba minisitiri b’imari babo ntibagiye mu nama y’i Sao Paulo.
Uburusiya bukimara gutera Ukraine, ibihugu bikomeye byafatiriye umutungo wabwo, bitangira no kungurana inama niba bashobora kuwuha Ukraine. N’ubu ntibarumvikana, ariko bamwe muri bo bakoresha inyungu zibyawe n’uwo mutungo mu bikorwa byo gutera inkunga Ukraine.
Uburusiya buvuga ko baramutse bahaye Ukraine umutungo wabwo nabwo bwabafatira ingamba zikarishye.
Hagati aho, ni ubwa mbere Umuryango w’Afrika yunze Ubumwe ugiye mu nama ya G20 kuva umaze kwemerwamo ku buryo buhoraho mu kwa Cyenda k’umwaka ushize.
