Nyuma y’uko ikipe ya APR FC isezerewe na Mlandege muri ½ kuri penaliti, umutoza w’abanyezamu ba APR FC, Ndizeye Aime Desire aka Ndanda, yatangaje ko agaye imisifurire, kandi ko ikipe ya APR FC itazongera kwitabira iri rushanwa mu gihe bikimeze gutya.
Ikipe ya APR FC, yitabiriye irushanwa rya Mapinduzi cup, itangira nabi, ariko iza kubikosora itangira kuba ubukombe muri Tanzania, ubwo yahagamaga ikipe ya Simba FC, banganya 0-0.
Ibi byatangiye kuzamura igitinyiro cya APR FC, gusa bakayitega iminsi ko byose birangirira kuri Young Africans, ubwo bayinyagiraga 3-1, maze berekeza muri ½, aho bagombaga guhura na Mlandege FC yo muri Zanzibar, aho benshi babonaga ko ibintu bigiye koroha cyane, gusa iby’umupira bigira ibyawo, kuri uyu wa kabiri taliki 09 Mutarama 2024, ni bwo habaga umukino wa ½ cy’irangiza hagati ya APR FC na Mlandege.
Muri uyu mukino APR FC, yahabwaga amahirwe,bisa n’ibyari biyihiriye, ku munota wa 18, ubwo Shaiboub yafunguraga amazamu ku gitego cy’umutwe, ariko abasifuzi bagaragazaga ko yari yaraririye, ibi ntabwo ku ruhande rwa APR FC babyishimiye kuko babonaga nta kurarira kurimo.
Ndizeye Aime Desire , Ndanda, ntabwo yanejejwe n’imisifurire, ati’’Njye simfite byinshi byo kuvuga, ndakeka mwese mwarebye umupira, mbere na mbere turanenga abasifuzi bahengamiye uruhande rumwe, muri make ni igisebo kuri Zanzibar, ndanatekereza ko ari nayo nshuro ya mbere n’iya nyuma twitabiriye Mapinduzi Cup, mu gihe abasifuzi badasifura neza.’’
‘’Twatsinze ibitego babihakana, nta muntu utabibonaga.Gutsindwa nta kibazo, penaliti ni amahirwe, ariko umupira twakinnye twerekana ko turi hejuru ya Mlandege FC gusa abasifuzi ntibatubaniye.’’
Mu gihe ikipe ya APR FC, itegereje niba yazakina ihatanira umwanya wa gatatu , hagati y’ikipe ya Singida cyangwa Simba, ziza kwisobanura mu mukino wa ½, Ndanda ahamya ko ibyababayeho ari agahoma munwa agira ubutumwa agenera abanya-Tanzania.
Yagize ati’’Ndashaka mutangarize Abanya-Zanzibar, Abanya-Tanzania, ko twebwe ubutaha tutazagaruka muri iri rushanwa bikimeze gutya, amakipe araza buri gihe bikaba bikimeze gutya?, ntihari amakipe yaje umwaka ushize akibirwa aha akaba yaranze kugaruka?, twebwe si ubwa mbere tuje?, kuki abasifuzi batasifuye neza?, iki ni igisebo.’’
Nyuma y’uyu mukino, APR FC yari yanganyijemo na Mlandege FC, APR FC yaje gusezererwa kuri Penaliti 4-2, Kapiteni Shaiboub, yatowe nk’umukinnyi wahize abandi, ahabwa amafaranga angana n’ibihumbi magana arindwi na mirongo itanu y’amashilingi ya Tanzaniya, we ahitamo kuyaha abasifuzi.
