Abasirikare ba FARDC batangiye guhungira mu Rwanda – AMAFOTO

Nyuma y’uko inyeshyamba za M23 zirukanye abasirikare bo mu ngabo za Repubulika Iharanira Demokarasi ya Congo, FARDC, mu Mujyi wa Goma, abo basirikare batangiye guhungira mu Rwanda.

Mu gitondo cyo kuri uyu wa Mbere taliki 27 Mutarama 2025, nibwo abasirikare ba FARDC babarirwa muri 20 binjiye mu Karere ka Rubavu, bishyikiriza inzego z’umutekano z’u Rwanda zabanje kubambura intwaro n’ibikoresho bya gisirikare bari bafite.

Bamwe mu baganiriye n’itangazamakuru bavuze ko babonye barimo gutsindwa intambara bahanganyemo na M23, bahitamo kuza mu Rwanda.

Usibye aba basirikare, inzego zishinzwe abinjira n’abasohoka zikomeje kwakira Abanyekongo bakomeje guhungira mu Rwanda.

Kugeza magingo aya imirwano iracyakomeje mu Mujyi wa Goma, aho inyeshyamba za M23 zigenzura igice kinini cy’uyu mujyi zikomeje guhangana n’ingabo za FARDC.