Mu Burasirazuba bwa Repubulika Iharanira Demokarasi ya Congo, haraturuka amakuru avuga ko Ntawunguka Pacific wiyise General Omega uyobora umutwe wa FDLR, yiciwe mu mirwano.
Amakuru y’urupfu rwa Gen Omega, yamenyekanye mu ijoro ryo kuri uyu wa Gatandatu rishyira ku Cyumweru taliki 26 Mutarama 2024.
Gen Omega wasimbuye Gen Mudacumura Sylvestre ku buyobozi bw’umutwe wa FDLR, biravugwa ko yapfuye, nyuma yo kuraswa agakomereka.
Gen (Rtd) James Kabarebe yigeze kuvuga ko yahamagaye Gen Omega amusaba gutaha, undi amubwira ko azagaruka mu Rwanda, nta Mututsi ugihari.
Umutwe wa M23 wari watangaje ko Gen Omega yarasiwe mu Kibaya cya Kibumba hafi na Kibati mu Burasirazuba bwa Congo, bivugwa ko yatewe bombe.
Amakuru agera ku itangazamakuru avuga ko benshi mu barindaga Gen Omega bapfuye, abandi barakomereka.
Imirwano ihanganishije ingabo za M23 n’ihuriro ry’ingabo za Leta ya Kinshasa yafashe indi ntera, kuko iherutse no kugwamo uwari Umuyobozi w’Intara ya Kivu y’Amajyaruguru.
