Kuri uyu wa 23 Ukuboza 2024, ku marembo y’Umujyi wa Goma hongeye kubera imirwano y’ihuriro ry’ingabo za Repubulika Iharanira Demokarasi ya Congo n’umutwe witwaje intwaro wa M23.
Iyi mirwano yari ihanganishije impande zombi yabereye muri gurupoma ya Kibumba iherereye muri teritwari ya Nyiragongo, yafunze umuhanda munini uhuza Goma na teritwari ya Rutshuru.
Lawrence Kanyuka, uvugira umutwe wa M23 ku rwego rwa politiki, yasobanuye ko ihuriro ry’ingabo za Leta ryafunze uyu muhanda, ritangira kurasa mu basivili bo muri Kibumba.
Ati: “AFC/M23 irabamenyesha ko guhera saa cyenda n’igice kuri uyu wa Mbere taliki 23 Ukuboza 2024, ihuriro ry’ingabo za Leta ya Kinshasa ryafunze umuhanda wa Goma-Rutshuru, rigaba ibitero ku basivile muri Kibumba, mu bice byegeranye no ku birindiro byacu.”
Ni mu gihe Lit Col Willy Ngoma, uvugira umutwe wa M23 ku rwego rwa gisirikare, yatangaje ko abarwanyi babo bafashe igifaru cy’ihuriro ry’ingabo za Leta, ateguza ko biteguye gukomeza kurwanira abasivile mu gihe bagabwaho ibitero.
Yagize ati: “Turarwanirira abaturage bacu kandi dushimiye Fatshi (Perezida Tshisekedi wa RDC) ku bw’iki gifaru cy’intambara. Muzane amavuta, turiteguye.”
Imirwano ikomeye muri Kibumba yaherukaga mu ntangiriro za 2024. Imirwano ihanganishije impande zombi, ikaba imaze iminsi irenga 21 muri Teritwari ya Lubero.
