Minisiteri y’ubuzima (MINISANTE) yatangaje ko kuri iki cyumweru tariki ya 06 Ukwakira 2024 yatangiye gukingira abantu icyorezo cya Marburg, ikaba yahereye ku bakozi bo kwa muganga n’abafite aho bahuriye n’abarwayi.
Minisitiri w’ubuzima ,Dr Sabin Nsanzimana, yatangaje ko u Rwanda rwaraye rwakiriye inkingo za mbere za Marburg, zatanzwe na Leta Zunze Ubumwe Za Amerika.
Dr. Sabin Nsanzimana, yavuze ko inkingo zigiye gukingirwa abanyarwanda zizewe kuko zasuzumwe neza, kandi nta ngaruka ziteza.
Yagize ati:” Uru rukingo rwa Marburg, mu nkingo zose zimaze igihe zikorwa, nirwo rukingo ruteye imbere kurusha izindi zose. Rwarakoreshejwe muri Uganda umwaka ushize, rwakoreshejwe no muri Kenya ndetse no muri Leta Zunze Ubumwe Za Amerika mu mujyi wa Maryland”.
MINISANTE itangaza ko kugeza kuri uyu wa gatandatu tariki ya 5 ukwakira 2024, abantu bose bamaze kwandura iki cyorezo ari 46, muri 29 bakaba bakivurwa, 12 bakaba bamaze kwitaba Imana bazize iki cyorezo naho abandi 5 bakaba bamaze gukira iki cyorezo.
Minisitiri w’ubuzima yatangaje ko kandi hari n’imiti ibiri yabonetse yo guca intege virusi ya Marburg, ikanubaka ubudahangarwa bw’umubiri buhangana niyi virusi, iyi nayo ikaba yatanzwe na Leta Zunze Ubumwe Za Amerika nubwo ngo iyo miti atari myinshi, ariko agashima abafashije u Rwanda kubona izo nkingo n’imiti byorohereza abarwayi.
Minisitiri w’ubuzima Dr Sabin Nsanzimana, atangaza ko ukurikije uko bimeze uyu munsi hari icyizere ko iyi virusi izarangira vuba, ahereye ku rugero rw’abantu 5 bakize iyi virusi ya Marburg.
