Uwitwa Nshimiyumukiza Elias w’imyaka 22 y’amavuko, washinjwaga guhungabanya umutekano w’abaturage, yashatse kurwanya Polisi iramurasa.
Nshimiyumukiza yarasiwe mu gishanga cya Kagina giherereye mu Murenge wa Runda gihingwamo ibisheke ahita apfa, ibi byatangajwe n’ubuyobozi bw’umurenge wa Rukoma mu Karere ka Kamonyi.
Munyakazi Epimaque, Gitifu w’Umurenge wa Rukoma, yabwiye itangazamakuru ko nyakwigendera yarashwe ubwo hakorwaga Operasiyo yo gufata abakekwaho guhungabanya umutekano w’abaturage.
Yagize ati: “Uyu yashatse gutema Umupolisi wari Umufashe amurasa yitabara.
Gitifu Munyakazi yavuze ko uwarashwe akomoka mu Murenge wa Ngamba, Akagari ka Kabuga, mu Mudugudu wa Musenyi, ariko yarasiwe mu Murenge wa Runda.
Akomeza avuga ko umurambo wa nyakwigendera wajyanywe bya Remera-Rukoma kugira ngo ukorerwe isuzuma.
Mu minsi yashize mu mirenge itandukanye yo mu Karere ka Kamonyi hagiye humvikana amakuru y’insoresore zitwaza imihoro zigahungabanya umutekano w’abaturage zinabambura utwabo.
