Ikigo cy’Igihugu Gishinzwe Uburezi bw’Ibanze mu Rwanda, REB cyongeye gutanga amahirwe yo gusaba buruse yo kwiga Kaminuza ku barimu. Ubusanzwe iyi buruse yahabwaga abafite ikiciro cya mbere cya kaminuza (A1), n’abarangije amashuri yisumbuye (A2), ariko kuri iyi nshuro abahawe amahirwe ni abarangije amashuri yisumbuye mu ishuri nderabarezi, TTC na NP(Normale Primaire) gusa.
Aha ngaha buri wese yahise yibaza impamvu aba A1 batongeye guhabwa amahirwe uyu mwaka.
Mu gushaka kumenya impamvu uyu mwaka aba A1 batahawe amahirwe, umunyamakuru wa Umurunga yakoze ubucukumbuzi n’ubusesenguzi maze amenya aya makuru n’ubwo nta rwego rushinzwe uburezi rurayemeza.
Imwe mu mpamvu z’ingenzi ni uko ubu kurangiza icyiciro cya kabiri cya kaminuza (A0), muri Kaminuza y’u Rwanda byabaye imyaka 4 aho kuba imyaka 3 nk’uko byari bisanzwe.
Abanyeshuri bazimukira mu mwaka wa kabiri ( Level 2) mu kwezi kwa Cyenda ( September Intake) ndetse n’abazatangira mu wa mbere( Level 1) ndetse n’abazakurikiraho nibo barebwa n’iyi gahunda y’imyaka 4.
Bityo rero kuko umu A1 aba yarize imyaka 2, bisaba ko agenda agahera ku mu mwaka wa gatatu ( L3) bamufashe akagenda mu kwa Cyenda yahita asiga abandi bigasaba ko azabategereza umwaka umwe, rero aho kubategereza yarataye akazi, yaba ari mu kazi akazahabwa aya mahirwe umwaka utaha 2025 akomezanya n’abazaba bageze mu mwaka wa gatatu.
Tubibutse ko umwarimu uhawe iyi buruse yiga ibihe byose ( Full time program), asiga akazi ariko akaguma ku rutonde rw’abarimu mu kigo yakoragamo( Placement) ndetse no ku rutonde rwo guhembwa ( Payroll) agahembwa bisanzwe akanahabwa amafaranga ya buruse agenerwa abandi banyeshuri. Gusa hari amakuru avuga ko hari amafaranga runaka bakatwa ku mushahara wabo.
Kuri iyi nshuro abarimu bifuza iyi buruse bujuje ibisabwa ubusabe bwabo buzanyuzwa muri sisiteme ya TMIS guhera tariki ya 30 Gicurasi kugera ku itariki ya 14 Kamena 2024.
