Imirwano ihanganishije Ingabo za Leta ya Sudan n’umutwe wa Rapid Support Forces (RSF) iragenda irushaho gukura abantu mu byabo no guhitana abatari bake, nyuma y’uko muri Al Fasher, muri Darfur y’Amajyaruguru, impande zihanganye zombi ziri kwifashisha intwaro zirimereye n’indege z’intamabara.
Nyuma y’uko iyi mirwano iri kubera muri Al Fasher igeze mu mujyi no mu nkengero z’isoko rikuru, abasivile bamwe bahasize ubuzima abandi barakomereka.
Ku wa 10 Gicurasi 2024, imirwano yasize byibura abagera kuri 850 bataye ingo zabo, nk’uko bitangazwa n’Umuryango Mpuzamahanga wita ku mpunzi n’abimukira.
Muri iyo mirwano abana n’abagore bagera kuri 27 bahasize ubuzima, abandi 130 bakomereka bikabije.
Amakuru avuga ko abakomeretse ubu bigoye kwitabwaho kuko ibitaro bajyanywemo bifite ubushobozi bucye ugeraranyije n’umubare wabo.
IOM itangaza imibare ko byibura hagati ya taliki 01 na 18 Mata, abagera ku hihumbi 46 bavanywe mu byabo.
Kuri ubu hari impungenge ko imirwano ihanganishije Ingabo za Leta ya Sudan na RSF izahitana ubuzima bwa benshi batari borohewe n’amakimbirane y’amoko yashinze imizi muri Darfur no mu nkengero zayo.
Akarere ka Darfur kaza ku mwanya wa mbere mu turere twashegeshwe n’iyi ntambara, aho umutwe wa RSF ushinjwa gushinga imitwe y’inyeshyamba z’Abarabu, ku ntego zo kwirukana abafite uruhu rw’irabura, harimo abo mu bwoko bw’aba Masaalit.
RSF yo ivuga ko muri Darfur hasanzwe harasubiye kwadukamo imvururu hagati y’aba Masaalit n’Abarabu.
Imiryango Mpuzamahanga itanga ubutabazi, kugeza ubu ntiyorohewe no kwinjira muri Al Fasher kuko inzira zose zijyayo zamaze gufungwa.
IOM ivuga ko guhera hagati muri Mata 2023, abantu bagera ku bihumbi 570 bimuwe muri Leta ya Darfur y’Amajyaruguru.
