Mu gitondo cyo kuri uyu wa Kabiri taliki 30 Mata 2024, abarwanyi ba M23 bazindutse bakozanyaho n’Ingabo za Leta ya Congo, FARDC, bari bafatanyije n’abafatanya bikorwa bazo.
Iyi mirwano yumvikanyemo ibisasu biremereye, byakomerekeje bamwe mu baturage bahungaga, yabereye muri Teritwari ya Masisi ugana muri Santire ya Rubaya.
Biravugwa ko FARDC-Wazalendo ariyo yabanje kugaba igitero, ifunga umuhanda wa Bihambwe, hanyuma M23 yirwanaho ibigizayo.
Lawrence Kanyuka, usanzwe uvugira M23 mu bya Politiki, yavuze ko ku rundi ruhande, mu masaha ya mu gitondo n’ubundi kuri uyu wa Kabiri, FARDC yagabye igitero ku turere dutuwe cyane i Karuba, Mashaki, Kagundu nabwo abaturage barahakomerekera.
Kanyuka yakomeje avuga ko M23 izakomeza gushakira umutekano abaturage cyane cyane ibarinda FARDC, FDLR, MERCENARIES, MILITIA, Ingabo z’u Burundi n’Ingabo za SADC.
Umuyobozi wa M23, Bertrand Bisimwa abinyujije kuri X yavuze ko muri iyo mirwano hari intwaro zimwe bafatiyemo, aboneraho no kugaragaza ko Leta ya Kinshasa aho kugana inzira y’ibiganiro ngo barangize intamabara ahubwo ishishikajwe no kwica abaturage.
