Centrafrique: Ihuriro rya CPC ryubuye ibitero ku ngabo za leta, hasabwa kongerwa abasirikare

Ihuriro ry’imitwe yitwaje intwaro rishyigikiwe na Bozizé wahoze ayobora Repubulika ya Centrafrique rya CPC (Coalitions des Patriotes pour le Chengement) ryubuye ibitero muri iki gihugu.

Kuri uyu wa 17 Mata 2024, abarwanyi b’iri huriro bari kugaba ibitero ku basivire no ku birindiro by’ingabo za Centrafrique nk’uko byatangajwe na radiyo mpuzamahanga y’Abafaransa, RFI.

Mu gace ka Kologbota kari mu birometero 30 ujya muri Komini ya Bakouma iri mu majyaruguru y’Uburasirazuba bw’iki gihugu taliki ya 14 Mata 2024 izi nyeshyamba zatwitse inzu esheshatu zica n’abantu babarirwa mu 10.

Ku wa 15 Mata 2024, ikindi gitero cyagabwe ku birindiro by’ingabo za leta biherereye mu gace ka Kadjama kari mu birometero 30 ugana muri Komini Markounda. Icyo gihe hicwa abasirikare babiri n’abasivire batatu.

Maxime Balalou, Umuvugizi wa Guverinoma ya Centrafrique, yatangaje ko mu bice CPC iri kwibasira hazongerwa Ingabo za leta.

Ati: “FACA irajya kugarura umutekano mu bice inyeshyamba ziri gukoreramo.”

Mu 2020 nibwo CPC yashinzwe, ifite intego yo kurwanya ubutegetsi bwa Perezida Faustin-Archange Touadéra wateganyaga kongera kwiyamamariza kuba umukuru w’igihugu.

CPC igizwe n’imitwe ya 3R, UPC, MPC, Anti-Balaka Mokom, FPRC na Anti-Balaka Ngaissona.