Mu rwego rwo kugerageza gukura umutwe wa M23 mu bice bikikije Sake kugira ngo hafungurwe umuhanda wa Sake-Minova, urubyiruko rw’abiyise Wazalendo bafatanyije na FARDC, baramukiye mu ntambara aho bagabye ibitero kuri uyu mutwe.
Kuva mu rukerere rwo kuri uyu wa 27 Werurwe 2024, mu masaha ya saa cyenda z’igitondo ni bwo iyo mirwano yatangiye nk’uko amakuru aturuka mu mirongo y’urugamba abivuga.
Amakuru kandi avuga ko ababikurikiranira hafi bavuze ko iyi mirwano yatangijwe n’Ingabo za Leta ya Congo, FARDC, n’abambari bazo bose.
Abo bemeza ko iyo mirwano igamije kugira ngo izo ngabo zibarizwa ku ruhande rwa Leta ya Kinshasa zirebe uko zakura M23 muri iyo misozi ikikije Sake mu rwego rwo kwikuraho igitutu cyo kuba M23 yarabagoteye mu Mijyi ya Sake na Goma.
Leta irashaka kwambura M23 umuhanda uva mu Mujyi wa Sake muri Kivu ya Ruguru werekeza i Bukavu muri Kivu Y’Epfo unyuze mu tujyi duto nka Minova na Shasha.
Uruhande rwa M23 rwo rutangaza ko rudashaka kurekura uwo muhanda kuko ari bwo buryo bahisemo bwo kumvisha Leta kugira ngo yemere ibiganiro.
Abanyamakuru begereye aho iyi mirwano iri kubera nibo bemeza aya makuru, gusa nta ruhande na rumwe mu zihanganye ruragira icyo ruyivugaho.
