Muri Repubulika ya Demokarasi ya Congo, Imiryango itegamiye kuri Leta irashinja MONUSCO guha M23 rugari ikigarurira ibice bimwe na bimwe.
Aya makuru yashyizwe hanze ejo hashize ko Ingabo za MONUSCO zasize ibirindiro byazo biri i Kihondo ho muri Teritwari ya Rutshuru zikajya mu gace ka Rwindi.
Imiryango itegamiye kuri Leta, ivuga ko iki gikorwa Ingabo z’Umuryango w’Abibumbye zakoze, giha rugari mu kubererekera abarwanyi ba M23 gukomeza gufata ibindi bice bitandukanye.
Uyu muryango utegamiye kuri Leta ukomeza uvuga ko wamenye amakuru y’uko MONUSCO yabanje kunyura i Kashalira na Kibirizi mbere yo kugera i Rwindi.
Mu kwezi kwa Mutarama nabwo byavuzwe ko Ingabo za MONUSCO zivanye mu bice byo muri Gurupoma ya Ngungu bigaha M23 icyuho cyo kwigarurira ibice bimwe na bimwe, icyo gihe ntibyavuzweho rumwe.
Ni mu gihe umutwe wa M23 ushinja MONUSCO guha ubufasha FARDC bwo kuyihiga, ikindi Ingabo za MONUSCO ngo zigira uruhare mu gukusanya amakuru y’ubutasi ikoresheje Drones zifata amashusho ndetse no guha ibikoresho Ingabo za Congo.
Muri uku kwezi kwa Werurwe hagati MONUSCO nanone yigeze gushinjwa na M23 gutiza ibirindiro FDLR na FARDC maze bakarasa mu baturage.
