Mu Karere ka Burera umugabo witwa Ntambara Fidèle w’imyaka 30 y’amavuko yavuye gusenga, ari kumwe n’umugore we Nyiranzeyimana Florence bagenda batongana mu nzira, bageze mu rugo umugore arahukana, nyuma umugabo baza kumusanga mu nzu amanitse mu mugozi bikekwa ko yiyahuye.
Ibi byabaye ku Cyumweru taliki 17 Werurwe 2024, bibera mu Murenge wa Nemba mu Kagari ko Rushara ho mu Mudugudu wa Cyave.
Inzego z’ibanze zabwiye Igicumbinews ko inzu yabo yiriwe ikinze, bibutse ko umugore wo muri urwo rugo yahukanye, bahita bajya kwica urugi, basanga umugabo amanitse mu mugozi yamaze gupfa.
SP Jean Bosco Mwiseneza, Umuvugizi wa Polisi mu Ntara y’Amajyaruguru, yabwiye Igicumbinews ko uwo muryango wari usanzwe ubana mu buryo bunyuranyije n’amategeko, ndetse ko bajya bagirana amakimbirane ashingiye ku mutungo.
Yagize ati: “Bari bafitanye amakimbirane ashingiye ku mutungo. Polisi iragira inama abaturage gutangira amakuru ku gihe y’ingo zibana zifitanye amakimbirane, icyaha kigakumirwa kitaraba.”
