Nyuma y’iminsi micye mu Burasirazuba bwa Congo hari agahenge, imirwano hagati y’Ingabo za Congo, FARDC, n’inyeshyamba za M23 yongeye kubura.
Imirwano iri kubera mu bice bya Sake no mu nkengero zayo, ndetse amakuru ava muri RD Congo aravuga ko abatuye muri ibi bice bari guhunga imirwano.
Uba ahitwa Mubambiro, Jean Francois Rutwara, aganira na BBC yagize ati: “Twari tumaze iminsi hari agahenge, ariko uyu munsi haramutse imirwano ikomeye cyane, kandi biragoye kumenya uwateye undi bwa mbere.”
Muri Centre ya Sake gusubira iburasirazuba werekeza Mubambiro, hari kugenzurwa n’ingabo za leta, SADC n’abitwa Wazalendo, mu gihe imisozi ikikije Sake iri mu maboko ya M23.
Lawrence Kanyuka, Umuvugizi wa M23 kuri X yatangaje ko “Ingabo za leta n’abakorana na zo, kuva muri iki gitondo bateye abaturage b’abasivile i Sake n’inkengero zayo.”
Yakomeje avuga ko M23 yarinze abaturage ibyo bitero byagabwe ahitwa i Sake, Macafe, Mitumbara, Lushoga, Kagundu no mu nkengero zaho.
Inyeshyamba za M23 kandi zavuze ko zafatiye intwaro muri iyo mirwano, gusa nta rundi ruhande rwigenga rwemeje aya makuru.
Nyuma y’imirwano ikomeye yaherukaga i Sake mu kwezi gushize, hari hashize ibyumweru birenga bibiri nta mirwano ihumvikana.
Gusa mu minsi ishize, inyeshyamba za M23 zagiye zigarurira tumwe mu duce two muri Rutshuru na Masisi.
