Mapendo Gilbert, Umunyamabanga Nshingwabikorwa w’Umurenge wa Murama wo mu Karere ka Ngoma, yakoze impanuka igwamo umwana w’imyaka itandatu abandi icyenda barakomereka.
Abo banyeshuri bo ku bigo bya Gs. Nyagasambu na E.M.L.R Christians School n’umugenzi umwe, bagenderaga iruhande rw’umuhanda mu nzira y’abanyamaguru.
Uwitabye Imana ni umwana w’imyaka itandatu witwa UMUKUNDWA Brenda Kelly.
Uyu ni we mwana wahitanywe n’impanuka
Abakomeretse ni Nyiransabimana Denyse w’imyaka 18, Niyomwungeri Prince w’imyaka 10, Iranzi Era w’imyaka 5, Gisubizo Frank w’imyaka 17, Umukundwa Liliane w’imyaka 7, Cyubahiro Frank w’imyaka 7,Iduhuze Ingabire Josiane w’imyaka 12, Birahamye Pacifique w’imyaka 18 na Uwodukunda Daria w’imyaka 16.
Iyi mpanuka yabereye mu Karere ka Gasabo mu Murenge wa Rusororo mu Kagari ka Bisenga ho mu Mudugudu wa Gisiza, byabaye ku wa Kabiri tariki 05 Ukuboza 2023.
Gitifu Mapendo Gilbert, yavaga i Kigali yerekeza i Rwamagana, atwaye imodoka yo mu bwoko bwa Jeep Toyota RAV4 ifite plaque ya RAC 777 E.
Amakuru yamenyekanye, ni uko Gitifu yavuye mu gisate cy’iburyo yagenderagamo akajya mu gisate cy’ibumoso bwe akagonga abanyamaguru.
ACP Rutikanga Boniface, Umuvugizi wa Polisi yatangaje ko impanuka yatewe n’ubusinzi bw’uwari atwaye ikinyabiziga.
Yagize ati: “Ubuzima bw’abantu burahenze kandi buranababaza. Iyo umuntu abuze ubuzima, iyo amugaye.
Ni byiza ko hari imyanzuro tugomba gufata, gutwara ikinyabiziga kitaringaniye ku muvuduko, umuntu yanyweye ibisindisha cyangwa ibiyobyabwenge, kugenda utubahiriza amategeko. Twongereho kubasaba kubahiriza amategeko y’umuhanda.”
Mu gihe umurambo wa nyakwigendera wari utegerejwe mu buruhikiro, wabanje kujyanwa ku Kigo Nderabuzima cya Nyagasambu.
Abakomeretse nabo bajyanywe mu Bitaro bitandakunye by’aho iyi mpanuka yabereye kugira ngo bitabweho n’abaganga.
Gitifu Mapendo Gilbert afungiye kuri sitasiyo ya Polisi ya Rusororo.
