Ingabo za Repubulika Iharanira Demokarasi ya Congo (FARDC) n’imitwe bakorana ndetse n’abancacuro barashinjwa n’umutwe wa M23 kugaba ibitero ku ngabo z’umuryango wa Afurika y’Iburasirazuba zoherejwe kugarura amahoro muri Congo (EACRF).
Amakuru yo kuri uyu wa 16 Ukwakira 2023, avuga ko ingabo zo muri Uganda zagabweho igitero, byabaye ubwo Wazalendo irwanya M23 yategaga igico bikarangira kiguyemo izi ngabo.
Ibi byabereye mu bilometero bibarirwa muri bitanu uvuye ahitwa Rutshuru ugeze ahitwa Rukoro.
Lawrence Kanyuka, Umuvugizi wa M23 (ishami rya Politiki) yavuze ko bamagana bivuye inyuma kiriya gitero, agira ati: “cyagabwe ku modoka za EACRF i Rukoro, bikozwe n’ihuriro ry’Ingabo za Guverinoma ya Kinshasa FARDC, FDLR, Abacancuro, inyeshyamba za (Wazalendo) na FDNB (ingabo z’u Burundi).”
Kugeza ubu EAC cyangwa Leta ya Congo ntacyo baratangaza kuri iki gitero ngo hamenyekane niba hari ingabo za Uganda zakiguyemo.
Mbonimpa Bénjamin, Umunyamabanga Nshingwabikorwa wa M23, yatangaje anibutsa ko ibi byabaye nyuma y’amasaha 48 izi zingabo zitegujwe kuraswaho nyuma y’uko Wazalendo izishinje gukorana n’uriya mutwe.
