Mu mukino wo kwishyura wahuzaga ikipe ya Rayon Sports na Al Hilal Benghazi, amakipe yombi yakomeje guhatanira kujya mu matsinda ya CAF Confederation Cup,gusa Rayon Sports birangira isezerewe kuri penalities 4 kuri 2.
Ni umukino watangiye saa kumi n’ebyiri zuzuye zo mu Rwanda, kuri Kigali Pele Stadium, ikipe ya Al Hilal Benghazi, yatunguye Rayon Sports iyitsibura igitego ku munota wa mbere, aba Rayon bifata mapfubyi bumva ko bagiye guhura n’imvura y’ibitego mk’uko byagendekeye APR FC inyagirewa na Pyramids, 6-1, gusa Rayon Sports yakomeje kwihagararaho ndetse yatsa umuriro kuri Al Hilal Benghazi, maze ku kazi gakomeye kakozwe na Luvumbu, Ojera ntiyagatesha agaciro, ku munota wa 39, afungura amazamu.
Ku ruhande rwa Al Hilal, igitego cyari cyatsinzwe na Ezzedin ku munota wa mbere.
Mu gice cya kabiri, amakipe yombi yazanye imbaraga, gusa wa mugani w’umunyarwanda ko inkoko iri iwabo ishonda umukara, Rayon Sports yagerageje ibishoboka, gusa umunyezamu wa Al Hilal Benghazi, ababera ibamba kugera ku munota wa nyuma.
Nyuma y’iminota 90, hakurikiyeho gutera Penalities, maze abasore bo muri Libya, bagaragaza ubudasa, kuko binjije penaliti enye zose, naho ikipe ya Rayon Sport, Kalisa Rachid , wateye iya mbere arayihusha, Master nawe ahusha indi, n’ubwo, Aimable Nsabimana, na Charles Baale, binjije Penaliti zabo, gusa ntacyo babashije kuramira, mu gihe umunyezamu Adolphe atigeze abasha no kuyobya umupira n’umwe waterwaga n’abasore baturiye inyanja ya Mediterane.
Amakipe yose yo mu Rwanda yari mu marushanwa mpuzamahanga arasezerewe
Ku ikubitiro ikipe y’igihugu Amavubi yasezewe mu gikombe cya Afurika, ibaye iya nyuma mu itsinda ryayo
Bashiki babo, nabo basezererwa basuzuguwe cyane n’ikipe ya Ghana y’abagore, ibatsinze igiteranyo cy’ibitego 12 ku busa.
Ikipe ya APR FC, nayo yasezerewe mu mikino ya CAF Champions League, itsindiwe mu misiri n’ikipe ya Pyramids, ibitego 6-1.
Na Rayon Sports yayikinnye ku mubyimba nayo isezerewe na AL Hilal Benghazi, nyuma yo kunganya igitego 1-1, bakayikuramo kuri Penaliti 4-2.
Rayon Sports itsinzwe n’ikipe yakiniye ku bikomere
Ikipe ya Al Hilal Benghazi, yagakwiye kuba yaravuye mu marushanwa mbere kuko Rayon Sports yari ifite uburenganzira bwo kuyitera mpaga, kuko Rayon Sports yagiye muri Libya, iyi kipe yanga gukina kuko nta byishimo yashakaga i Benghazi, mu gihe agace ka Derna, bahana imbibi abantu barimo bapfa ubutitsa, kubera umwuzure wahitanye abasaga ibihumbi icumi.
Al Hilal Benghazi, yaracumbagiye, iza i Kigali, nyuma y’ubwumvikane bw’amakipe yombi ko imikino yose izabera i Kigali, yemwe baje nta n’abafana bitwaje, amwe mu mahirwe Rayon Sports iteye inyoni.
Ni ikipe yakinnye mu gihe benewabo barimo bashyingurwa abandi bakiburirwa irengero.
Andi Amafoto
