Mu gihe ikipe ya Rayon Sport yari yahagurutse i Kigali yerekeza mu gihugu cya Libya gukina umukino n’ikipe yaho ya Al Hilal Benghazi, bikomeje guhwihwiswa ko uyu mukino ushobora gusubikwa kuko iyi kipe yo muri Libya ititeguye gukina ku wa Gatanu taliki 15 Nzeri 2023, kuko bari mu kiriyo.
Igihugu cya Libya cyahuye n’akaga cyane cyane ku italiki 12 Nzeri 2023, aho batewe n’umwuzure udasanzwe bimaze gutangazwa ko abantu bagera ku bihumbi bitatu (3000) ari bo bahatakarije ubuzima, naho abasaga ibihumbi icumi (10000) bakomeje kuburirwa irengero, ibi bikaba ari yo ntandaro yo gusubika umukino wagombaga guhuza amakipe yombi.
Ikipe ya Rayon Sport yari yahagurutse mu Rwanda kuri uyu wa kabiri taliki 12 Nzeri 2023, yerekeza i Tripoli igakomereza i Benghazi, aho yagombaga guhatana na Al Hilal Benghazi mu marishanwa nyafurika ya CAF Confederation Cup.
Amakuru UMURUNGA.com wamenye ni uko kugeza ubu ishyirahamwe nyafurika rishinzwe imikino rikomeje kuba mu rungabangabo kuko nta mwanzuro urafatwa niba umukino wasubikwa, wakwimurirwa ahandi, cyangwa niba Rayon Sport yahita igaruka mu Rwanda.
Itsinda Rayon Sport yahagurukanye yerekeza muri Libya
Bamwe mu bafana bajyanye na Rayon Sport, bamaze gutangariza UMURUNGA.com ko ikipe ubu igeze i Cairo mu Misiri, nyuma yo kuva muri Ethiopia, ikaba yiteguraga kwerekeza muri Libya, yatubwiye ko kugeza ubu ubona ikipe ikomeje urugendo mu gihe itaramenyeshwa niba koko hari impinduka zabaye mu mukino.
Ati” Mu by’ukuri ayo makuru aragenda atubera mashya gusa binateye ubwoba, yego ikibazo cyabo nkanjye ndacyumva, ariko byahita biduhangayikisha ukuntu twakongeraho iminsi cyangwa tukagaruka nta mukino ubaye mbese ubu twaba tugiye mu ihurizo rikomeye.”
Nk’uko tubikesha umunyamakuru, Imfurayacu Jean Luc, wajyanye n’iyi kipe, ngo nta cyemezo kugeza ubu gisubika uyu mukino barabona, ahubwo ngo amakipe yombi yatumijwe mu nama na CAF, itegura uyu mukino uteganyijwe kuba ku munsi wa Gatanu, ati”Rayon Sport ikomeje urugendo rwerekeza i Benghazi.Kugeza ubu nta cyemezo gikuraho umukino kiraza.CAF yanditse ibaruwa itumira amakipe yombi mu nama yo kwitegura umukino uzaba ku wa gatanu.”
Ibaruwa ya CAF itumira amakipe yombi mu nama itegura umukino
Ikipe ya Rayon Sport iri muri aya marushanwa ihagarariye igihugu cy’u Rwanda.
  Abakinnyi ba Rayon Sport bari babukereye
