Mu gihe mu minota mikeya ishize ikipe ya Rayon Sport yari imaze gusesekara amahoro mu mugi wa Benghazi, amakuru atugeraho ni inama yahuje amakipe yombi bemeranyije gusubika umukino, igihe uzasubukurirwa imikino yombi ikabera i Kigali.
Ibintu bikomeje kurushaho kuba bibi mu gihugu cya Libya, cyane cyane i Benghazi hagombaga kubera umukino wa Rayon Sports na Al Hilal Benghazi, aho mu gace ka Berna, gahana imbibi na Bengazi, umwuzure umaze guhitana abasaga ibihumbi 5.
Umunyamakuru Imfurayacu Jean Luc, wajyanye n’ikipe ya Rayon Sports, yatangaje ko kuri ubu amakipe yombi yamaze kubyemeranya hakaba hasigaye ko ishyirahamwe ry’umupira w’amaguru muri Africa, CAF, ribyemeza.
Rayon Sports yari yageze i Benghazi amahoro
Ati”Umukino wa Al Hilal Benghazi na Rayon Sports ntabwo ukibaye kuri uyu wa 5. Aha ibintu si byiza kuko abarenga 5000 bamaze kubarurwa ko batakarije ubuzima mu biza byagwirije iki gihugu muri iyi minsi, kandi imibare irakiyongera.”
”Imikino ibiri yombi abanya-Libya basabye Rayon Sports ko yakwemera ikabera i Kigali. Rayon Sports irabyemeye, Hasigaye umugisha wa CAF”
Mu gihe ubusabe bw’abanya-Libya bwakwemerwa na CAF ikabishimangira Rayon Sports yahita igaruka mu Rwanda, igategereza undi munsi uyu mukino uzakinirwa.
