Mu gihe habaga umukino wahuzaga ikipe ya Kiyovu Sport na Bugesera FC, muri shampiyona y’icyiciro cya mbere mu Rwanda, ku rupapuro Bugesera yari insina ngufi imbere ya Kiyovu gusa yaje kuyihinahina iyikoreza umuba w’ibitego.
Mu myaka ibiri ishize Kiyovu Sports yagiye iba iya kabiri muri shampiyona y’u Rwanda gusa nabwo igashinjwa uburangare, kuko yatangiraga neza gusa igasoza itakaza imikino mu buryo butunguranye benshi batabitekerezaga gusa kuri iyi nshuro irimo kugaragaza ibimenyetso byo kuzaba ikipe itanga amanota ititangiriye itama.
Ikipe ya Bugesera isa n’aho yatangiye gutera ubwoba amakipe, yatsibuye Kiyovu Sports ibitego 4-0.
Ni ibitego byatsinzwe na Ani Elijah, Vincent Adams, Ndizeye Eric( Wa Kiyovu witsinze), na Muzungu Olovier.
Iyi kipe ya Bugesera ni amateka ikoze itaherukaga kuko yaherukaga gukora ibi ubwo yanyagiraga Marines FC, ibitego 6-2.
Shampiyona y’uyu mwaka ishobora gutungurana, AS Kigali yakubitiwe ahareba inzega na Gasogi United iyitsinda 2-1, naho Rayon Sport yahagamwe na Gorillas, n’Amagaju, zose banganya bakagabana amanota.
APR FC, yatsinze Etoile yiyushye akuya igitego 1-0 cyinjijwe na Kwitonda Alain Bacca mu mukino wavunikiyemo abakinnyi bakomeye barimo Mbaoma na Shaboub.
