Imirwano ikaze hagati y’ingabo za Repubulika Iharanira Demokarasi ya Congo (FARDC) n’Inyeshyamba zo mu mutwe wa Mabondo, yabaye ku wa gatatu Taliki 23 Kanama 2023.
Iyi mirwano yabereye neza mu marembo y’Umujyi wa Kinshasa muri Komine ya Maluku muri Groupement Mbankana.
Iyi mirwano yaguyemo inyeshyamba nyinshi n’abasirikare benshi nk’uko ACTUALITE. CD yabitangaje.
Amakuru yatangajwe na Soki Milanda umuyobozi wa Groupement ya Mbankana, avuga ko iyi mirwano yaraye ibaye haguyemo abasirikare bane ba FARDC.
Uyu muyobozi yakomeje avuga ko izi nyeshyamba arizo zabanje kugaba igitero kuri FARDC mu kuzisubiza hapfa inyeshyamba zibarirwa muri mirongo.
Amakuru akomeza avuga ko impamvu nyamukuru yo kugaba igitero inyeshyamba za Mabondo zashakaga kwiba intwaro za Congo.
Abaturage batuye muri kariya gace bavuga ko izi mpande zombi ziri mu mirwano zari zisanzwe ari incuti kugeza ubwo bajyaga banahurira ku kirahure cya byeri.
Amakuru ariho ubu ni uko FARDC yohereje abasirikare benshi mu gace ka Groupement ya Mbankana, mu rwego rwo gukumira ibindi bitero.
